Ақтөбеде оқушы анасын өлтіріп, әжесін пышақтады деп ұсталды
Ақтөбеде 16 жастағы жасөспірім анасын өлтіріп, 72 жастағы әжесіне пышақ салды деп күдікке ілінді.
Астана, NEGE. Қаладағы пәтерлердің біріне шақырту бойынша барған жедел топ зорлық белгілері бар әйелдің мәйітін тапқан. Сол пәтерден пышақ жарақаттары бар 71 жастағы қария да анықталып, дереу ауруханаға жеткізілген.
Полицияның мәліметінше, жасөспірім өз кінәсін мойындап отыр. Тергеу жүріп жатыр.
Оқиғаны облыстық балалардың құқын қорғау басқармасының басшысы Латып Әліби де растады. Оның айтуынша, қаза тапқан әйел – күдіктінің анасы, ал жараланған қария – әжесі.
«Баланың жасы 16-да. Толық отбасында тәрбиеленген, әлеуметтік жағдайы жақсы. Оқу үлгерімі де жақсы болған. Мінезі тұйық. Тергеуге байланысты қосымша мәлімет бере алмаймыз», – деді Әліби.
Жарақат алған әже №1 Ақтөбе қалалық ауруханасының травматология бөліміне жатқызылған. Дәрігерлер оның есі анық, сөйлей алатынын және жағдайы тұрақты екенін айтты.