Ақтөбеде қоғамдық тәртіпті бұзған жолаушы әуе рейсінен түсірілді
Түркістан облысының 48 жастағы тұрғыны түрлі құқық бұзушылық жасағаны үшін әуе рейсінен түсірілді, деп хабарлайды Polisia.kz.
Алматы, NEGE. Ақтөбе станциясындағы желілік полиция бөлімінің қызметкерлері Ақтөбе-Шымкент бағытындағы әуе кемесі командирінің актісіне сәйкес, 48 жастағы Түркістан облысының тұрғынын рейстен түсірді.
Полиция қызметкерлері тексеру кезінде ішімдіккке сылқия тойған азаматтың өзін дөрекі ұстап, экипаждың талаптарын орындамағанын, авиакомпания қызметкерлеріне балағат сөздер айтқанын анықтады. Тіпті, полиция бөлмесіне жеткізу кезінде ол билік өкілдерінің заңды талаптарына бағынбай, қасақана қарсылық танытқан.
Құқық бұзушыға қатысты ҚР ӘҚБтК-нің үш бірдей бабымен яғни, қоғамдық орындарға алкогольдік масаң күйде келгені, ұсақ бұзақылық жасағаны және құқық қорғау органы қызметкерінің заңды талабына бағынбау бойынша әкімшілік хаттамалар толтырылды.
Материал процессуалдық шешім қабылдау үшін сотқа жолданды.
