Ақтөбе облысында шет ел азаматтары мінген автобус аударылып, бес адам қаза тапты
Қайғылы жағдай 7 желтоқсан күні таңертең болған. Самара – Шымкент тасжолының Ақтөбе облысы аумағындағы бөлігінде жолаушылар автобусы аударылып, бес адам қаза тапты.
Астана, NEGE. Алдын ала мәлімет бойынша, Самара – Шымкент тасжолымен Қызылорда облысына қарай беталып бара жатқан жолаушылар автобусы Әйтеке би ауданының Ұлғайсын ауылы маңында апатқа ұшыраған.
Автобус салонында Өзбекстан Республикасының 49 азаматы болған. Олар Пермь – Ташкент бағытымен кетіп бара жатқан.
Жол апаты салдарынан 5 адам оқиға орнында көз жұмды, тағы 11 адам түрлі жарақатпен Әйтеке би аудандық ауруханасына жеткізілді.
Жол-көлік оқиғасы бойынша сотқа дейінгі тергеп-тексеру басталды, қазір апаттың мән-жайы анықталып жатыр.