Ақтөбе облысында ата мен немересі джиппен бірге суға батып кетті
Ақтөбе облысында із-түзсіз жоғалған атасы мен немересі суға батқан көліктің ішінен табылды.
Алматы, NEGE. Қайғылы жағдай Хромтау ауданында болды. Төтенше жағдайлар департаментінің мәліметінше, 25 маусымда 65 жастағы ер адам мен оның кәмелетке толмаған немересінің жоғалғаны туралы хабар түскен. Олар Toyota Hilux автокөлігімен Құдықсай ауылынан Бозжыр өңіріне бет алған, алайда қайта оралмаған.
Келесі күні іздестіру-құтқару жұмыстары басталып, оған сүңгуірлер де тартылды.
«26 маусымда сағат 19:30-да Құдықсай ауылы маңындағы Орь өзенінің арнасын шолу кезінде көлік табылды. Сүңгуірлер 2,5 метр тереңдіктен, жағалаудан 4 метр қашықта баланың денесін алып шықты. Сондай-ақ судан көлік пен ер адамның мәйіті де шығарылды», – делінген Ақтөбе облысы ТЖД хабарламасында.
Көліктің суға қалай кеткені әзірге белгісіз.Оқиғаның мән-жайы анықталып жатыр.
Ақтөбе облысының ТЖД өкілдері тұрғындарды су айдындарының маңында қауіпсіздік шараларын сақтауға және қолжетімсіз жерлерде жүріп-тұрғанда өте мұқият болуға тағы да шақырды. Төтенше жағдай туындаса, 112 нөміріне бірден хабарласу қажет.