Желіде ерлі-зайыптының интимді видеосы тараған: күдікті ретінде жасөспірім ұсталды
Ақтау қаласының полиция қызметі WhatsApp мессенджері арқылы интимді бейнематериалды заңсыз тарату дерегі бойынша күдікті анықталып, ұсталғанын хабарлады.
Астана, NEGE. Қаладағы танымал тамада мен оның жұбайы өздері үшін түсірілген жеке видеосын әлдекімдер әлеуметтік желілер мен мессенджерлер арқылы таратып жібергеніне шағымданып, полицияға жүгінген. Блогер ерлі-зайыпты ақпараттың таралуына бұрын олармен жұмыс істеген мобилографтардың бірінің қатысы болуы мүмкін екенін мәлімдеген.
Бұл дерек бойынша Қылмыстық кодекстің 147-бабымен (жеке өмірге қолсұғылмаушылықты бұзу және жеке өмір туралы мәліметтерді тұлғаның келісімінсіз заңсыз тарату) қылмыстық іс қозғалды.
«Жүргізілген жедел-іздестіру іс-шараларының нәтижесінде күдікті ұсталды. Ол – Ақтау қаласының кәмелетке толмаған тұрғыны. Өзге де мән-жайлар анықталуда», – делінген хабарламада.
Полицейлер өзге тұлғаның жеке және құпия материалдарды рұқсатсыз тарату қылмыстық жауапкершілікке әкеп соғатынын ескертті.
