Ақтауда такси қымбаттады
Ел аумағында такси құны ең арзан қалалардың бірі – Ақтау. Алайда, осы айда аталған қызмет бағасы біршама қымбаттап кетті.
Алматы, NEGE. Бұған күшейтілген карантинге байланысты қоғамдық көліктің тоқтап қалуы себеп.
Бұрын Ақтауда 300-350 теңге тұратын қызмет түрі қазіргі кезде 450-700 теңгеге бір-ақ жетті. Бағаның күрт көтерілгеніне тұрғындар жиі шағымдануда.
«Мен Маңғышлақта тұрамын. Ақтауға қатынау үшін такси қызметін 450-500 теңге аралығына шақыратын едім. Қазір 600-1000 теңгеге ғана келеді. Кішкентай қала Ақтаудың ішінде де такси 400-ден жоғары. Ең болмаса қоғамдық көлік қайтадан жүрсе болар еді», – дейді қала тұрғыны Раушан Талапқызы.
Маңғыстау облысы бас санитар дәрігерінің қаулысына сәйкес, облыс бойынша 20 шілдеден бастап карантиннің күшейтілуіне байланысты қоғамдық көлік толықтай тоқтаған.
Қазіргі таңда қала бойынша тұрғындардың тек жеке көлікпен немесе таксимен жүруіне рұқсат беріліп отыр.