Дүние
АҚШ-та коронавирус жұқтырғандар саны 11-ге жетті
АҚШ-тың Калифорния штатының Сан-Бенито округінде коронавирус жұқтырған тағы екі адам тіркелді. Бұл вирустың адамнан адамға ауысқанын көрсетеді, деп хабарлады АҚШ Денсаулық сақтау министрлігіне сілтеме жасаған РИА Новости.
Алматы, NEGE. Бұған дейін АҚШ-та тоғыз адамның коронавирус жұқтырғаны расталған еді. «Ал соңғы оқиғада ерлі-зайыптылар сырқаттанған. Олардың екеуі де 57 жаста. Күйеуі жуырда Уханьнан келген. Ал әйелі Қытайға бармаған. Демек оған қауіпті індет күйеуінен жұққан болуы мүмкін» делінген министрлік таратқан мәліметте.
Ал South China Morning Post газетінің хабарлауынша, Азия елдерінде коронавирус жұқтырғандар саны 95 адамға жеткен. Европада – 23, Австралияда – 12 адам сырқаттанған. Бұған дейін осы дерттен Қытайдан тыс жерде көз жұмған алғашқы адам тіркелген еді. Ол Филиппинде қайтыс болды.