АҚШ-та 12 қабатты ғимарат құлады: қаза тапқандар бар
АҚШ-тың Флорида штатындағы Майами-Дейд округінде 12 қабатты ғимарат құлады. Қайғылы оқиғадан бір адамның қаза тапқаны белгілі. 99 тұрғын із-түзсіз жоғалған.
Алматы, NEGE. Апат орнында құтқарушылар арнайы техникамен іздестіру жұмыстарын жалғастырып жатыр. Оған 80 өрт сөндіруші техника тартылды.
Мамандар үйінділер астында ондаған адам болуы мүмкін екенін айтады. Құтқару жұмыстары жалғасып жатыр. Ақпарат көздерінің хабарлауынша, 35 адам құтқарылды. Көбі дәрігердің көмегіне жүгінген. Әзірге ғимараттың ішінде нақты қанша адам болғаны белгісіз.
Айта кетейік, опырылып түскен ғимаратта 100-ден астам пәтер болған. Жағалаудағы бұл апатқа не себеп болғаны әзірге белгісіз.
«102 адамның аман қалғанын білеміз. Олардың нақты қайда екені белгілі. Әлі де 99 тұрғынды іздестіріп жатырмыз. Құтқару-іздестіру жұмыстары жалғасуда», – деді Майами-Дейд мэрі Даниэлла Левин Кава.
