АҚШ Украинаға әскери көмек беруді тоқтатады
Бұл туралы Америка президентінің баспасөз хатшысы Кэролайн Левитт мәлімдеді.
Алматы, NEGE. Fox News арнасына берген сұхбатында Левитт АҚШ-тың негізгі басымдығын тағы бір мәрте еске салды. Ол – бейбіт келіссөздер. Ал Украина президенті өз ұстанымынан қайтпай отыр.
"Трамптың әкімшілігі Украинадағы қақтығысты қаржыландыруды тоқтатады. Себебі негізгі басымдық – бейбіт келіссөздер. Бұдан былай біз нағыз әрі мықты бейбітшілік болмаса, алыста жатқан елдегі соғысқа чек жазып беруді доғарамыз", - деді Левитт.
Айта кетері, 28 ақпанда Зеленский мен Трамп Ақ үйде кездескен болатын. Сирек кездесетін металдар бойынша келісімге қол қойылады деген жоспар да болды. Алайда Зеленский алдымен АҚШ вице-президенті Джей Ди Венспен дауласып қалды, одан кейін Трамппен пікір таласты. Осыдан кейін Зеленский Ақ үйден уақытын бұрын кетіп қалды.