АҚШ-тан Коста-Рикаға депортацияланғандар арасында Қазақстанның 3 азаматы бар
Коста-Рика Трамп әкімшілігі АҚШ-тан депотациялаған алғашқы 200 мигрантты қабылдады. Олардың қатарында Қазақстанның 3 азаматы бар.
Алматы, NEGE. Бұған дейін АҚШ-тан Коста-Рикаға депортациялау рейсімен заңсыз мигранттардың шығарылатыны хабарланған. Олардың көбі Азиядан келген азаматтар екені айтылды.
«Рейтер» агенттігінің хабарлауынша, мигранттар ел астанасы Сан-Хоседен Панама шекарасы маңындағы лагерьге жіберілді. Оларға мұнда бір ай қалуға рұқсат етілген.
Америка Құрама Штаттары саяхат шығындарын, соның ішінде бұл мигранттарды өз елдеріне апаратын рейстерді төлейді. Халықаралық көші-қон ұйымы гуманитарлық көмек көрсетеді.