АҚШ-тан Алматыға пошта сәлемдемесі арқылы ірі есірткі партиясын салып жіберген
Қаржылық мониторинг агенттігі Алматыда АҚШ-тан пошта сәлемдемесі арқылы есірткінің ірі партиясын әкелу фактісін әшкереледі.
Алматы, NEGE. Жедел іс-шаралардың нәтижесінде Алматы, Петропавл, Семей, Көкшетау, Шымкент және Өскемен қалаларында халық тұтынатын тауарлар түрінде жасырылған есірткі заттары бар («марихуана» және «каннабис сығындысы») АҚШ-тан келген пошта сәлемдемесін ел аумағына өткізген азаматтар ұсталды. Нәтижесінде заңсыз айналымнан шамамен 8 кг марихуана және 15 кг-ға жуық каннабис сығындысы (гашиш майы)тәркіленді.
Қазіргі уақытта сотқа дейінгі тергеу жүргізіліп жатыр, ҚР он азаматы ұсталып, УҰИ-ға қамауға алынды. Жедел-тергеу шаралары Бас көлік прокуратурасын үйлестірумен жүргізілді.
ҚР ҚПК-нің 201-бабы тәртібінде өзге ақпарат жария етілмейді.
Жыл басынан бері Агенттікпен есірткі айналымы фактілері бойынша 93 қылмыстық іс тіркелген. Заңсыз айналымнан 52 кг есірткітәркіленді, оның ішінде гашиш – 8,7 кг, марихуана – 4,8 кг. Сонымен қатар, 1,7 кг психотроптық заттар тәркіленді (пирролидин – 974 гр., тетрагидроканнабинол - 780,3 гр., метамфетамин-1,26 гр.), анаболиктер (улы зат) – 206 мың дана және «Тропикамид» көз тамшылары – 1 680 дана.
