АҚШ-та президент сайлауының нәтижесі қашан шығады?
5 қарашада АҚШ-та президент сайлауы өтеді. Сайлау нәтижесіне қарай Дональд Трамп пен Камала Харристің бірі АҚШ-тың 47 президенті атанады.
Алматы, NEGE. АҚШ-тағы сайлау учаскелері жергілікті уақыт бойынша сағат 6:00-де (Астана уақыты бойынша 15:00-де) жұмысын бастайды.1960 жылы қалыптасқан дәстүр бойынша бірінші болып Канадамен шекаралас орналасқан Диксвилл Нотч елді мекенінің тұрғындары дауыс береді.
18 жасқа толған америкалықтар сайлау учаскесіне келіп дауыс береді немесе толтырылған бюллетеньді пошта арқылы жібере алады.
Әр штатта дауыстарды санау тиісті сайлау учаскелері жабылғаннан кейін жүргізіледі. Уақыт әр штатқа қарай өзгеріп отырады, бірақ әдетте сайлау учаскелері жергілікті уақыт бойынша кешкі сағат 19:00 шамасында жабылады. Қазақстанда ол уақытта түн болады.
Сонымен қатар, Америка Құрама Штаттарындағы уақыт белдеуінің айырмашылығы да маңызды рөл атқарады – штаттардың көпшілігінде дауыс беру нәтижелері есептеліп болған кезде, Аляска және Гавайи сияқты штаттарда адамдар әлі де сайлау учаскелеріне барып, дауыс беріп жатады.
2020 жылдың 3 қарашасында өткен жалпыхалықтық сайлауда сайлау учаскесіндегі дауыс беру нәтижелері бірден белгілі болған. Нәтижелер Facebook желісінде тікелей эфирде көрсетілді. Ал биыл түпкілікті нәтиже бірден анықталмауы мүмкін. Сарапшылар пошта арқылы жіберілген бюллетеньдерді санау ұзаққа созылуы мүмкін екенін айтады.
Жаңа президенттің инаугурациясы 2025 жылдың 20 қаңтарында Капитолий алаңында өтеді.
