АҚШ соты 75 елдің азаматына иммиграциялық виза беруді тоқтату туралы шешімнің күшін жойды
АҚШ федералдық соты Президент Дональд Трамп әкімшілігі Қазақстанды қоса алғанда, 75 елдің азаматтарына иммиграциялық виза беруді мерзімсіз тоқтату туралы шешімнің күшін жойды.
Астана, NEGE. Манхэттендегі федералдық судья Жанетт Варгас Мемлекеттік департаменттің саясатын «анық заңсыз» деп танып, мемлекеттік хатшы Марко Рубионың заңда белгіленген өкілеттігі шегінен шыққан деген қорытындыға келді, деп жазады Reuters.
Сот шешімі 21 тамызда шығарылды. Варгас Мемлекеттік департаменттің қаңтарда енгізген саясаты федералдық иммиграциялық заңнамаға қайшы екенін мәлімдеді.
Судьяның айтуынша, АҚШ заңнамасы иммиграциялық виза беру туралы шешімді өтініш берушінің азаматтығына ғана сүйеніп қабылдауға жол бермейді. Әрбір өтініш жеке қаралуы тиіс.
Айта кетейік, АҚШ Мемлекеттік департаменті 2026 жылғы 21 қаңтардан бастап 75 елдің азаматтарына иммиграциялық визалар беруді тоқтатқан. Ресми тізімге Қазақстан, Қырғызстан, Өзбекстан, Ресей, Армения, Әзербайжан, Беларусь, Пәкістан, Бангладеш және басқа да мемлекеттер кірді.
Бұл шектеу АҚШ-қа тұрақты тұру үшін көшуді жоспарлаған адамдарға арналған иммиграциялық визаларға қатысты болды. Туристік, іскерлік және басқа да иммиграциялық емес визалар бұл шектеуге кірген жоқ.
Мемлекеттік департамент бұл елдерден келген азаматтардың АҚШ-та мемлекеттік әлеуметтік көмекке тәуелді болу қаупі жоғары екенін алға тартқан. Департаменттің мәлімдеуінше, саясат иммигранттардың ел бюджетіне қаржылық салмақ түсірмеуін қамтамасыз ету мақсатында енгізілген.
Алайда судья Варгас мұндай тәсіл заңға сәйкес келмейтінін атап өтті. Оның пікірінше, өтініш берушінің әлеуметтік көмекке тәуелді болу қаупін әр адамға қатысты жеке бағалау қажет, азаматтығына қарап жаппай шектеу енгізуге болмайды.
Сот шешімі тізімдегі 75 елдің азаматтарына иммиграциялық виза беруді жаппай тоқтатудың құқықтық негізін жояды. Яғни бұған дейін тек осы саясатқа байланысты виза беруден бас тартылған өтініштерді қайта қарауға мүмкіндік пайда болады. Дегенмен сот шешімі АҚШ-қа көшуге немесе иммиграциялық виза алуға автоматты түрде кепілдік бермейді. Өтініштер АҚШ-тың қолданыстағы иммиграциялық талаптарына сәйкес жеке тәртіппен қаралады.