Ақмола облысында жол апатынан екі адам қаза тапты
Ақмола облысында болған ірі жол апатынан екі адам көз жұмып, тағы төртеуі ауруханаға жеткізілді.
Алматы, NEGE. Облыстық полиция департаментінің мәліметінше, оқиға 16 тамыз күні сағат 11:45 шамасында «Астана–Петропавл» тасжолының 277-шақырымында, Көкшетау мен Щучинск қалаларының арасындағы аумақта болған. Kia K5 және Volkswagen Passat маркалы екі көлік соқтығысқан.
– Жол апаты салдарынан Volkswagen Passat жүргізушісі мен бір жолаушысы оқиға орнында қаза тапты. Ал Kia K5 жүргізушісі мен үш жолаушысы түрлі жарақатпен медициналық мекемеге жеткізілді. Қазір оқиғаға қатысты сотқа дейінгі тергеу жүргізіліп жатыр, – деді Патрульдік полиция батальонының командирі, полиция подполковнигі Азамат Ахметов.