Ақмола облысында шахтада заңсыз алтын іздеуші қаза тапты
Апатты жағдай бүгін, 23 наурызда Ақмола облысы Бестөбе кентіндегі шахтада болған.
Астана, NEGE. Шахта опырылуы салдарынан бір адам қаза тауып, тағы екі адам зардап шекті, деп хабарлады өңірлік полиция департаменті.
Зардап шеккен екі адам ауруханаға жеткізілген.
«Бұл факт бойынша қылмыстық іс қозғалды, қажетті тергеу шаралары жүргізіліп жатыр. Оқиғаның себептері мен мән-жайы анықталуда», – деп хабарлады облыстық полиция қызметі.
Еске салсақ, бұған дейін Бестөбе ауылындағы алтын өндіретін «Новая» шахтасы аумағынан ер адамның мәйіті табылғанын жазған едік. Алдын ала мәліметтерге сәйкес, ер адам аумаққа заңсыз кірген. Полицейлердің анықтауынша, қаза тапқан азамат Степногорск қаласының 1991 жылғы тұрғыны болып шықты.
