Ақмола облысында ерлі-зайыпты суррогат анамен соттасып, ақшасын қайтарып алды
Ақмола облысында сот суррогат ананы шарт бойынша міндеттемелерін бұзғаны үшін тапсырыс берушілерге ақшаны қайтаруды міндеттеді.
Астана, NEGE. Сот мәліметінше, 2024 жылы ерлі-зайыптылар Е. мен Д. суррогат ана болу туралы шарт жасасқан. Олар екі рет ұрықтандыру әрекетін жасауға келіскен. Бірінші әрекет кезінде эмбрион бекімеген. Осы кезде ерлі-зайыптылар суррогат ана болуға келіскен әйелге 500 мың теңгеден астам қаражат аударған. Оны әйел тексерілуге, дәрі-дәрмекке, жол шығындарына жұмсауы тиіс болған.
2025 жылғы наурыз айына жоспарланған екінші әрекет әйелдің келмеуіне байланысты іске аспаған. Кейін ерлі-зайыптылар емханамен эмбрионды сақтау шартын тоқтатқан.
Ерлі-зайыптылар әйелге жұмсалған қаражатты өндіру және моральдық зиянды өтеу туралы талаппен сотқа жүгінген.
Бірінші сатыдағы сот әйелге ерлі-зайыптылардың пайдасына 550 мың теңге материалдық және 500 мың теңге моральдық зиян өндіруді жүктеген. Облыстық сот алқасының қаулысымен бірінші сатыдағы сот шешімі өзгертіліп, моральдық зиянды өндіру талабының күші жойылды.
Сот материалдық шығындар негізді түрде өндірілгенімен келіскен: 550 мың теңге әйелге екінші жүктілікке дайындалу үшін берілген, алайда жүктілік болмаған. Дегенмен сот алқасы моральдық зиянды өтеу талап етілмейтінін анықтады.
«Шартта эмбрионды сақтау шарттары көрсетілмеген және Д. оның сақталуына жауапты емес. Ерлі-зайыптылар эмбрионды ЖШС-мен жасалған шарт негізінде сақтаған және өз өтініштері бойынша эмбрион жойылған. Эмбрионды жою туралы шешім Д.-ның әрекеттерінің салдары екенін дәлелдейтін айғақтар сотқа ұсынылмады. Д. тек талапкерлердің мүліктік құқықтарын бұзған», – делінген сот хабарламасында.
Сот алқасының қаулысы заңды күшіне енді.
