Ақмола облысында 22 мың гектардан астам жер учаскесі мемлекет меншігіне қайтарылды
Ақмола облысында кадастрлық құны 323 млн теңгені құрайтын 22 мың гектардан астам егістік жер учаскелері мемлекет меншігіне қайтарылды.
Алматы, NEGE. Ақмола облысының прокурорлары пайдаланылмай жатқан жер телімдерін анықтау және қайтару бойынша жүйелі жұмыстарды жүргізуде. Мысалы, қазіргі таңда Біржан сал ауданының прокуратурасы "Жайылымдық жерлерді ұлғайту" жобасын жүзеге асыруда.
"Жоба аясында аудандағы жер пайдаланушылардың едәуір бөлігі ұзақ уақыт бойы Жер кодексін бұза отырып, жер телімдерін нысаналы мақсаты бойынша пайдаланбағаны анықталды. Жол берілген заң бұзушылықтарға байланысты Біржан сал ауданы прокуратурасының қадағалау актісі бойынша кадастрлық құны 323 млн теңгені құрайтын 22 мың гектардан астам егістік жер учаскелері мемлекет меншігіне қайтарылды", – Ақмола облысының прокуратурасы
Бұл ретте жергілікті атқарушы органдар қайтарылған жерлерді адал жергілікті тұрғындар мен кәсіпкерлерге пайдалануға беруге бағдарланды.
Аталған бағыттағы жұмыстар жалғасуда, сонымен бірге жер пайдаланушылардан пайдаланылмай жатқан жер телімдерді өз еркімен қайтаруға қосымша назар аударылған.
