АИТВ жұқтырған ер адам қызды зорлаған: Омбудсмен жәбірленушінің жағдайын айтты

Астана, NEGE. Бұл туралы бала құқықтары жөніндегі уәкіл Динара Зәкиева мәлімдеді.

«2025 жылдың желтоқсанында тергеу өмір бойына бас бостандығынан айыру жазасын қарастыратын бап бойынша істі сотқа жіберді. Сот талқылауы барысында іс қайта сараланды, осыған байланысты біз прокуратураға жүгіндік. Біз Ішкі істер министрлігімен, анасымен және Ләззат Рақышевамен байланыстамыз. Қыз қауіпсіз жерде – мекемеде. Қызы мен анасын психологиялық қолдау көрсету орталығына шақырды, бір-бірімен хабарласып тұрады», – деп жазды Зәкиева Instagram желісіндегі stories бөлімінде. 

Еске салсақ, бұған дейін құқық қорғаушы Ләззат Рақышева Алматыда АИТВ жұқтырған ер адам 13 жастағы қызды зорлағанын мәлімдеді. Күдікті ретінде қыздың әкесінің досы танылды. Рақышева қыздың қажетті психологиялық көмек ала алмағанын және кейін сотта берген жауабын өзгерткенін жазған еді.

Күдікті ұсталған, істі полиция басшылығы бақылауына алған.