Air Astana мамырдың соңына дейін Дубайға әуе рейстерін орындамайды
Таяу Шығыстағы шиеленіске байланысты Air Astana әуе компаниясы Дубайға тұрақты рейстердің уақытша тоқтатылуын 31 мамырға дейін ұзартты.
Астана, NEGE. Әуе компания өкілдерінің хабарлауынша, орындалмайтын рейстер жолаушыларына әуе билеттерінің толық құны айыппұлсыз қайтарылады немесе жолаушылар сол қызмет көрсету класында 31 шілдеге дейін ұшатын рейстерге билеттерді тегін қайта брондай алады.
«Сондай-ақ, тариф пен әуежай алымдарындағы айырманы төлеу арқылы ұшу мерзімі 31 шілдеге дейінгі Air Astana рейстеріне бағытты тегін өзгерту мүмкіндігі қарастырылған. Егер билет бұрын айыппұл ұсталып қайта брондалған болса, ұсталған сома қайтарылмайды», – делінген компания хабарламасында.
Еске салсақ, бұған дейін Air Astana Алматы мен Астанадан Дубайға ұшатын тұрақты рейстерді тоқтату мерзімін 1 сәуірден 30 сәуірге дейін ұзартқан еді.
