Аида Балаева БАҚ өкілдерін тексерілмеген ақпаратты таратпауға шақырды
Бұған дейін БАҚ беттерінде «Қазақстанның Сыртқы істер министрі Мұрат Нұртілеу, кәсіпкер Гаджи Гаджиев және ҰҚК-нің бірқатар жоғары лауазымды қызметкерлері ұсталды» деген ақпарат тараған болатын.
Алматы, NEGE. Министр Аида Балаева Facebook-тегі парақшасында бұл ақпаратты жоққа шығарып, БАҚ өкілдерін тексерілмеген ақпаратты таратпауға шақырды.
«Кейбір ресми БАҚ пен анонимді телеграм-арналарда мемлекеттік қызметшілердің ұсталуына қатысты расталмаған ақпарат таралуда. Ақпарат таратқанда оның шынайылығын тексеру міндетті. Кінәсіздік презумпциясы қағидасы және журналистік этика бар екенін естен шығармау қажет. Көбіне расталмаған «хайп қуған» деректерге еремін деп, журналистер мұндай мәлімет азаматтарға және олардың жақын туыстарына зиян тигізуі, ар-намысы мен қадір-қасиетіне нұқсан келтіруі, жала болып шығуы мүмкін екенін есте ұстауы тиіс. Әріптестерді кәсіби БАҚ пен журналистер сақтауға тиіс міндеттемелерді орындауға шақырамын», - деп жазды Балаева.
Сондай-ақ ол жалған ақпарат таратқаны үшін әкімшілік және қылмыстық жауапкершілік қарастырылғанын еске салды.
