Ағайынды Әлібаевтарды ұрып-соққан полиция қызметкерлері жазалануы мүмкін
Бұған дейін Nege.kz сайты «Ағайынды Әлібаевтар: «Серік Үмбетовтің туыстары жала жауып, соққыға жықты» деген тақырыпта мақала жарияланған болатын.
Аталған мақалада Алматы облысына қарасты Жамбыл ауданының тұрғындары Мадияр мен Сапарбек Әлібаев «Серік Үмбетовтеің туыстарынан жәбір көрдік» деп Мемлекет басшысына, Ішкі істер министріне, Бас прокурорға және басқа да құзыретті органдарға шағымданған еді. Мақаладан кейін Алматы облысының Полиция департаменті реакция білдіріп, қылмыстық іс қозғалғанын мәлімдеді.
Осы мәселеге байланысты облыстық полиция департаменті кезекті рет хабарлама жасады.
«Алматы облысы Жамбыл ауданының полиция бөлімі қызметкерлерінің тарапынан мал ұрлығы бойынша күдікті болып, полиция бөлімшесіне жеткізілген екі жергілікті тұрғынға қатысты күш қолдану туралы бапқа қатысты Алматы облысы Жамбыл ауданының прокуратурасы 25.10.2021 жылы Жамбыл ауданы ПБ полиция қызметкерлеріне қатысты ҚР ҚК 146-бабының 2-бөлігі (азаптау) бойынша сотқа дейінгі тергеуді бастағанын хабарлаймыз. Сол күні Алматы облысы ПД өзіндік қауіпсіздік басқармасы қызметтік тергеу жүргізуді тағайындады, оның нәтижелері бойынша тәртіптік теріс қылықтар анықталған жағдайда аудандық ПБ лауазымды тұлғалары жауапкершілікке тартылатын болады», – делінген хабарламада.
