«Әділет» партиясының қатарына онлайн түрде қосылуға болады
Жаңадан құрылып, тіркелу сатысындағы «Әділет» саяси партиясы өзін цифрлық партия ретінде таныстырып, азаматтарды платформа арқылы онлайн түрде мүше болуға шақырды.
Астана, NEGE. Тіркелу үшін пайдаланушы ұялы телефон нөмірін, ЖСН енгізіп, өтінішті eGov Mobile арқылы электронды цифрлық қолтаңбамен растауы қажет.
Әзірге платформа пилоттық режимде жұмыс істейді. Ұйымдастырушылардың айтуынша, алдағы уақытта оның мүмкіндіктері кеңейтіледі. Атап айтқанда, қолданушылар партия қызметімен танысып, интерактивті талқылауларға қатысып, мүшелік есебін цифрлық форматта жүргізе алады. Сондай-ақ түрлі бастамаларды онлайн талқылау мүмкіндігі қарастырылған. Платформа өңірлер бойынша аналитикалық деректер мен интерактивті картаны да ұсынады.
Ұйымдастыру комитетінің мүшесі Қарлығаш Жаманқұлованың айтуынша, бұл платформа болашақта партия мүшелері үшін толыққанды цифрлық ортаға айналады.
«Қазірдің өзінде белгіленген қолдау санына жетіп қалдық. Дегенмен, осы платформа арқылы қолдаушылардың саны әлдеқайда көбейеді деп ойлаймыз. Тіркеу сәтті аяқталған соң да бұл сайт жұмысын жалғастырады. Жалпы бұл тек сайт емес, пікір алмасуға, талқылау жүргізуге, чаттар мен әлеуметтік желі форматындағы байланысқа мүмкіндік беретін алаң болады», – деді ол.
Оның айтуынша, партияны ресми тіркеу үшін құрылтай съезін өткізіп, кемінде 5 мың мүшеден тұратын тізім ұсыну қажет. Іс-шара 7 мамырға жоспарланған. Онда партияның жарғысы, бағдарламасы және басшылық құрамы бекітіледі.
