Абай облысындағы мұғалім танымал әнші Ники Минаждың саунд-продюсері болды
Абай облысындағы Абай атындағы мамандандырылған мектеп-гимназия-интернатында биология пәнінің мұғалімі болып жұмыс істейтін Ерқанат Садуханов әлемге танымал әнші Ники Минаж альбомының саунд-продюсері болды, деп хабарлайды Kazinform.
Алматы, NEGE. Облыстық білім басқармасының мәліметіне сүйенсек, жас педагог өзінің ұстаздық қызметін сүйікті ісімен қатар алып жүріп, халықаралық жобаларда шығармашылық қабілетін танытуда. Музыкалық әлемде ол @eraholic лақапатымен танымал.
Ерқанат Садуханов өз парақшасында Ники Минаждың «Pink Friday 2» альбомының делюкс-нұсқасының саунд-продюсері болғанын ресми түрде жариялады. Альбомның тұсаукесері 2024 жылдың 13 желтоқсанында жоспарланған.
Айта кетейік, Ерқанат бұрын әлемдік жұлдыздармен, атап айтқанда Dua Lipa, Rosalia және Blackpink тобының мүшесі Lisa-мен жұмыс істеген.
Ники Минаж – әлемдегі ең танымал рэп орындаушылардың бірі. Ол бірнеше марапаттың иегері, оның ішінде ASCAP сыйлығын «Ең үздік хип-хоп орындаушысы» номинациясында жеңіп алған. Сондай-ақ жақында Эминемді озып, ең көп қаралған рэпер атанды.
