Абай облысындағы мектепте жылыту қазандығы жарылып, от жағып жүрген жұмысшы ауруханаға түсті
Бұл туралы облыстық энергетика және тұрғын үй-коммуналдық шаруашылық басқармасының баспасөз қызметі хабарлады.
Алматы, NEGE. «22 қарашада сағат 10.55-те Үржар ауданы, Үржар ауылы, Б.Момышұлы атындағы орта мектебінің 20 м қашықта орналасқан қазандығы жарылған (алдын ала себеп жүйедегі айналымның бұзылуы, қазандықтағы қысымның жоғарылауы). Жарылыстан қазандықтың шатыры 60 шаршы метр аумаққа опырылып түскен. Салдарынан 1970 жылы туған жұмысшы Р.Телемісов, 1-2 дәрежелі 20 пайыз дене күйігімен (екі қолы мен бетін ыстық будан күйік шалған) Үржар аудандық орталық ауруханасының хирургия бөліміне жатқызылды», - делінген хабарламада.
Ведомствоның хабарлауынша, мектептегі оқушылар мен мұғалімдер эвакуацияланбаған, олар ары қарай оқуын жалғастырған.
Оқиғадан кейін резервтегі қазандықтың іске қосылғаны хабарланды.
