Абай облысында жол апатынан үш студент қайтыс болды
Семейдегі Әлихан Бөкейхан Университетінің үш студенті жол апатынан қаза тапты. Бұл туралы оқу орнынының басшылығы мәлімдеді.
Астана, NEGE. Оқиға 2 қараша күні Бесқарағай ауданы, Жыланды ауылының маңында болған. Омбы-Майқапшағай автожолында Toyota Avensis жеңіл автокөлігі мен Howa жүк көлігі бір-біріне соғылып, үш адам қаза тапты.
«Әлихан Бөкейхан Университетінің басшылығы, профессор-оқытушылар құрамы мен білім алушылары атынан оқыс жол-көлік оқиғасы салдарынан қаза тапқан университет өрендері – Заң факультетінің студенттері Тұрарбеков Нұрмағамбет Бауыржанұлы, Оңдабай Рефхат Серікжанұлы мен Ақпараттық технологиялар және экономика факультетінің студенті Абдималиков Рустамбек Нурмуродұлының ата-аналары мен туған туыстарына, жақындары мен дос-жарандарына қайғырып көңіл айтамыз»,– делінген оқу орнының хабарламасында.
Абай облысының полиция департаменті жол апатына қатысты «Көлік құралдарын басқаратын адамдардың жол жүрісі қағидаларын бұзуы, абайсызда екі немесе одан да көп адамның өліміне әкеп соғу» бабы бойынша тергеу басталғанын хабарлады.