Абай облысында мұғалім 7-сынып оқушысының денесіне қол жүгірткен
Әлеуметтік желілерде мұғалімнің сабақ үстінде оқушы қыздың құлағы мен мойнын ұстаған сәті түсірілген видео тарады.
Алматы, NEGE. Анықталғандай, видео 2023 жылы түсірілген. Оқушы қыз қазір 9-сыныпта оқиды.
Әлеуметтік желіде жарияланған хабардан кейін Балалар құқығын қорғау комитеті тексеру жүргізді.
«Мұғалім жалпы білім беретін мектепте 2020 жылдың 1 қыркүйегінен 2024 жылдың 6 наурызына дейін жұмыс істеді. Ол негізгі қызметкердің декреттік демалысы кезеңіне қабылданған болатын. 2024 жылдың наурызында еңбек шарты қызметкердің өз бастамасымен басқа қалаға көшуіне байланысты тоқтатылды», – деп мәлімдеді ведомство өкілдері.
Еске салайық, бұл жағдай Семейде әскери дайындық пәнінің мұғалімі 13 жастағы оқушы қызды зорлаған мектепте болып отыр. Ол өмір бойына бас бостандығынан айырылды.