Абай облысында биыл жол апатынан 24 адам көз жұмды
Абай облысында жыл басынан бері жол апатынан 24 адам көз жұмды.
Алматы, NEGE. Абай облыстық полиция департаменті баспасөз қызметінің мәліметіне сүйенсек, өңір бойынша биыл 145 жол-көлік оқиғасы тіркелген.
Соның салдарынан 24 адам көз жұмып, 201 адам жарақат алды. Жыл басынан бері 51 жаяу жүргіншіні көлік қақты.
«Семей қаласында көлік қағып кеткен 5 жаяу жүргінші мерт болған. Қайғылы оқиғалардың басты себебі – тұрғындардың жолды рұқсат етілмеген жерден кесіп өтуі және көліктердің жылдамдық режимін сақтамауы. Адамдар жолдан өтерде тіпті айналасына қарамай-ақ жүгіріп шығады. Жүргізуші көлік жылдамдығын тежеп үлгере алмай қалуы мүмкін», - делінген ақпаратта.
Еске салсақ, осыған дейін Шығыс Қазақстанда жол апатынан 3 адам зардап шеккені хабарланған.