ШҚО-да таулы жерде шыққан өрт екі күннен кейін сөндірілді

Алматы, NEGE. Шығыс Қазақстан облысы Күршім ауданындағы таулы жерде шыққан өрт екі күннен кейін толықтай сөндірілді, деп хабарлайды ҚазАқпарат.

ШҚО Төтенше жағдайлар департаменті баспасөз қызметінің мәліметіне сүйенсек, 6 шілде күні Күршім ауданының Құйған ауылдық округіндегі таулы жерді шыққан өрт екі күннен кейін ауыздықталды.

«8 шілдеде сағат 11.00-де жалпы ауданы 20 гектар аумаққа жайылған тілсіз жау толығымен сөндірілді. Өрт техника жетпейтін қиын жерде болғандықтан оны өшіру үшін құтқарушыларға жаяу жұмыс істеуге тура келген. Сол себепті өрт сөндіру жұмыстары ұзаққа созылды», - делінген ақпаратта.

Қызыл жалынмен күреске жергілікті атқарушы органдардан, ТЖД, Үлкен Нарын және Күршім орман шаруашылықтарынан 100-ден астам адам мен 15 техника жұмылдырылған.

Еске салсақ, кеше Күршім ауданындағы таулы жерде шыққан өрттің таралуы тоқтатылғаны хабарланған.