Аттракционнан құлаған баланың жағдайы қалай? (Видео)
Көктөбеде бірнеше жылдан бері жұмыс істеп тұрған аттракционнан ақау шығып, жасөспірім мертікті.
Алматы, NEGE. Төбе басында тұрған қауіпті ойын құралы жерден адамды көтеріп, қалаға қарай лақтыратыны үрей туғызбай қоймайды. Мейрам қарсаңында болған оқыс оқиға бейнежазбаға түсіп, желіде жылдам тарады. Құлаған жасөспірім аман, бірақ ауыр жарақат алған.
«Бала ауруханаға түскенде дәрігерлер медициналық тексеру жүргізіп, науқаста көптеген сынықтар бар екені анықталды. Баланың 3–4 омыртқасында компресиялық сынық және сол жақ білек сүйегі,он жақ табан сүйегі мен сол аяғының тобығы сынған. Науқасқа қажетті медициналық көмек толық көлемде көрсетілді», – деді Алматы қалалық балалар жедел жәрдем орталығының бас дәрігері Абай Құсайынов.
Сондай-ақ, ол баланың бүгінгі жағдай орташа ауыр екенін атап өтті. Қазір жасөсіпірім травматология бөлімінде ем қабылдап жатыр.
