900 тест: алған ұсталды, өткізген кім?
Өзбекстан азаматы елімізден заңсыз «COVID-19» инфекциясына арналған 952 тестіні алып өтпек болған.
Алматы, NEGE. 20 шілде күні Түркістан облысы прокуратурасымен құрылған жұмысшы топ пен аталған департаменттердің қызметкерлері Сарыағаш ауданында орналасқан кеден бекетінде тексеру жүргізген. Тексеру кезінде Өзбекстан Республикасының азаматы жалпы құны 3,6 млн теңге тұратын 56 қораптағы «COVID-19» инфекциясына арналған тестіні жүк көлігімен жасырын түрде алып өтпек болғанын анықтаған.
Жүргізушінің айтуы бойынша, аталған тауарды ол Ресей Федерациясынан алып келген. Бірақ кеден бекетінен өту барысында аталған тесттерге декларация тапсырмаған. Аталған факт бойынша уәкілетті органмен Қазақстан Республикасы Әкімшілік құқық бұзушылық туралы кодексінің 551-бабы 1-тармағымен әкімшілік құқық бұзушылық іс қозғалып, декларацияланбаған тесстер тәркіленген. Шетелдік заңбұзушыға 30 айлық есептік көрсеткіш мөлшерінде айыппұл салынған.
Одан бөлек, соңғы 4 күнде жұмысшы топпен тағы да 15 дәріханада жоғары бағада сатылған дәрі-дәрмектер анықталған. Әрбір дерек бойынша әкімшілік құқық бұзушылық туралы іс қозғау үшін жинақталған іс-құжаттар уәкілетті органға жолданған.
