500 Мбит/с: Шығысқа «Қазақтелекомның» жүйрік интернеті жетті
Біз бұған дейін «Қазақтелекомның» жүйрік интернетіне Қазақстанның бірқатар өңірлері қол жеткізгенін жазғанбыз. Енді Шығыс Қазақстанның орталығы – Өскемен қаласындағы «Нұрлы Жол» жаңа ықшамаудан тұрғындары да GPON технологиясының қызығын көре бастады.
«Нұрлы Жол» ықшамауданындағы көпқабатты алғашқы 5 үйдің тұрғындары бір ғана кабельдің көмегімен бірнеше қызмет түрін: жылдам интернет, цифрлық телеарна және IP-телефонияны пайдалана алады.
Естеріңізге салайық, 2018-2020 жылдар аралығында «Қазақтелеком» ауылдық жерлерге 14,5 шақырым талшықты-оптикалық байланыс жүйесін тартып, кең жолақты интернетке 2,5 мың мемлекеттік мекемені, ең алдымен – әкімдіктерді, мектептер мен ауруханаларды қосты. Талшықты-оптикалық байланыс жүйесіне қосылу нүктесінде мобильді операторлар өздерінің базалық станциясын орнатып, радиосигналдың көмегімен әр үйге телекоммуникация қызметін жеткізіп беріп отыр.
Алайда бұл жоба елді мекендердің бәрін бірдей қамти алмайды, сондықтан «Қазақтелеком» әр облыстан, әр аудан мен ауылдан «цифрлық әріптестер» іздеуді жалғастырады. Осы жобаның аясында еліміздегі шағын, орта және ірі бизнес өкілдері талшықты-оптикалық желіні және басқа да технологияны пайдаланып, өздерінің байланыс жүйесін құрып, қызмет түрлерінен пайда табуға және сонымен қатар ауыл тұрғындарының мәселесін шешуге атсалыса алады. Міне, Өскемендегі жаңа тұрғын үйлер осы механизм бойынша қызмет түрлеріне қосылды.
«Биылғы жылы «Қазақтелеком» шағын және орта бизнеспен ірі жобаны бастады. Бұл «Әріптестік жобасы» деп аталады. Бағдарламаның өзегі сол, жеке компаниялар қаражат іздейді, желі тарту құрылысын жүргізеді, бұдан соң телеком-оператор үйлерді және оның абоненттерін магистралды «оптикаға» қосады және әріптестерімен бірге жаңа желінің қызметін қамтамасыз етеді. Мұндай әріптестік аймақтардағы жеке кәсіпкерлікті дамытады», – дейді «Қазақтелеком» АҚ бөлшек сауда бойынша бас директоры Игорь Погребицкий.
Бұл инфрақұрылымға қосылуға жылжымайтын мүлік иелері мен олардың арендаторлары да мүмкіндік алды. Кеңселерді, сауда нүктелерін телефонияға бейнебақылау мен иентернетке қосуға таптырмас мүмкіндік туып тұр.
«Бірінші кезекте жаңа тұрғын үй кешенінің 230-дан астам пәтері қосылады. Біз тұрғындардың интернет пен телевидениені бірден пайдалануына мүмкіндік жасадық. Мұндай артықшылықтың қызығын көруге GPON технологиясы мүмкіндік береді. Әр пәтерге талшықты-оптикалық кабель тартылады, соның көмегімен абонент цифрлы ТВ, IP-телефония, 500 Мбит/с-ға дейін жүйрік интернетті пайдалана алады», – деп атап өтті «Қазақтелеком» АҚ Шығыс ӨТД бөлімшесі В2С-сегментінің коммерциялық директоры Ерлан Исанов.
Облыс орталығындағы жаңа тұрғын үйлермен бірге, Шығыс Қазақстанның моноқалаларын да телекоммуникация қызметіне қосу қамтамасыз етіледі. Жуырда Риддер қаласындағы көпқабатты үйлерді «оптика» желісіне жаппай қайта қосу жүргізілді. 11 көпқабатты үй тұрғындары қызметтерге қосылуға өтініш беріп, жаңа технологияның артықшылығын бағалады.
Айталық, мыс желідегі жіберу жылдамдығы бар-жоғы 8 Мбит/с болса, қазір GPON арқылы жылдамдық таңдалған тарифке байланысты 200-ден 500 Мбит/с-ге дейін жетеді.
«Біз отбасымызбен бірге бұл үйде көп жылдан бері тұрамыз, бірнеше ұрпақ ауысты. Ең алғаш «Қазақтелеком» Megaline қосқаны есімде, ол кезде қызмет түрлері енді пайда бола бастаған еді. Әрине, қазір ондай интернетпен қою шаңның арасында қаласың, сондықтан да «оптикаға» қуана-қуана қосылдық. Онда қызмет түрлері де көп, интернеті де жүйрік», – дейді Риддер тұрңыны Анастасия Метелкина.
Қазіргі уақытта Риддерде «оптикаға» шамамен 4 мың адам қосылды. Ал жалпы ШҚО бойынша 62 мыңнан асты. «Қазақтелеком» байланыс және интернет қызметтерімен аймақтың елді мекендерін «Ауылдағы цифрлық әріптес» жобасы бойынша қамтамасыз етуді жоспарлап отыр. Бұл жоба бойынша қызмет көрсететін шағын компаниялар есебінен «радиокөпір» арқылы жүйрік интернет әрбір үйге жетеді.
