4 жасар бала терезеден құлап кетті
Қарағандыда көпқабатты үйлердің бірінде бесінші қабатта орналасқан пәтер терезесінен 4 жасар бала құлап кетті. Сәби түрлі жарақатпен ауруханаға жеткізілді.
Алматы, NEGE. 1 тамыз күні сағат 23: 40-та Қарағандыда көпқабатты үйдің бесінші қабатындағы пәтердің терезесінен 2017 жылы туған бала құлап түсті. Алдын ала мәлімет бойынша, бала ересектердің қарауынсыз қалған. Ол Мақажанов атындағы клиникаға жеткізілді.
«Балада біраз жарақат бар - жабық кеуде жарақаты, оң жақ өкпенің көгеруі. Екі аяғы бірнеше жерден жарақаттанған. Иек аймағының көгерген жарасы. Іштің жарақаты. Жағдайы тұрақты, қазіргі уақытта жансақтау бөлімінде жатыр», - деп хабарлады Қарағанды облысы денсаулық сақтау басқармасының баспасөз қызметі.
Құтқарушылардың айтуынша, ересектер қарауынсыз қалу - балалардың жарақаттануы мен өлімінің негізгі себебі болып отыр.
Осыған байланысты облыстың ТЖД қызметкерлері ата-аналардан кішкентай баласын мұқият қадағалауды, оларды терезесі ашық үйде жалғыз қалдырмауды сұрайды.
