37 судья жұмыстан НЕГЕ кетті?
Мемлекет басшысы Қасым-Жомарт Тоқаев Жоғарғы сот төрағасы Жақып Асановты қабылдап, саланың жай-жапсарымен танысты. Өткен жылы Қазақстанда бірқатар сот тәртіптік және қылмыстық жауапкершілікке тартылғаны белгілі болды.
Алматы, NEGE. Кездесу барысында жаңа судьяларды іріктеу, конкурс рәсімдерінің ашықтығы мен кадрларды ілгерілету ісін объективті жүргізу мәселелері талқыланды. Қасым-Жомарт Тоқаевқа 2019 жылы заңсыз шешім қабылдаған, сот әдебін бұзған, аттестациядан өтпеген 37 судьяның теріс іс-әрекеттері үшін жұмыстан шығарылғаны туралы ақпарат берілді. Бірқатар соттың тәртіптік және қылмыстық жауапкершілікке тартылғаны жайында айтылды.
«Жақып Асанов Қазақстан президентіне сот шешімдерінің сапасын арттыруға бағытталған шаралар жөнінде мәлімет берді», – деп жазылған Ақорданың баспасөз қызметі таратқан хабарламада. Президенттің пікірінше, мемлекеттік органдар мен азаматтар арасындағы құқықтық дауларды шешу механизмі ретінде әкімшілік әділет құрылымын енгізу маңызды міндет саналады.
Қасым-Жомарт Тоқаев сот жүйесін реформалау жұмыстарын жалғастыру жөнінде тапсырма берді.
