26 наурыз – Халықаралық Арал күні болуы мүмкін

Астана, NEGE. Бұл жиын – Халықаралық Аралды құтқару қорының басқарма отырысы Қазақстанның төрағалығы аясында өтіп жатқан үшінші кездесу. Кездесуге Қазақстан, Қырғызстан, Тәжікстан, Түрікменстан және Өзбекстанның үкімет басшылары қатысты.

Күн тәртібінде негізінен 22 сәуірде Астанада өтетін мемлекет басшылары деңгейіндегі саммитке дайындық мәселелері талқыланды. Сондай-ақ президенттер қарауына ұсынылатын бірқатар құжат талқыланды.

Отырыста қаралған маңызды құжаттардың бірі – 26 наурызды халықаралық деңгейде Арал теңізіне арналған күн ретінде бекіту ұсынысы. Бұл тек күнтізбедегі жаңа дата емес, Арал тағдырына бейжай қарамайтын мемлекеттердің ортақ ұстанымын айқындайтын, өңірлік ынтымақтастықты нығайтатын қадам ретінде бағаланып отыр. 

«26 наурызды халықаралық деңгейде Арал теңізіне арналған күн ретінде белгілеу мәселесін қарастыруды жоспарлап отырмыз. Наурыз айы су ресурстарына қатысты маңызды күндерге бай. Егер бұл шешім қабылданса, ол тарихи оқиға болмақ. Бірақ әзірге бұл – тек жоба, түпкілікті шешім әлі қабылданған жоқ», – деді Қордың атқарушы комитеті төрағасының орынбасары, ҚР уәкілетті өкілі Серік Бекмағанбетов.

Ресми өкілдің айтуынша, ұсынылып отырған күннің символдық мәні ерекше. Себебі биыл Халықаралық Аралды құтқару қорының құрылғанына 33 жыл толды. Сондықтан аталған дата бастаманың тарихи мазмұнын тереңдете түседі.