23 қаңтардан бастап Қазақстан аумағында 1900-ден астам жер сілкінісі тіркелді
ҚР ТЖМ Сейсмологиялық байқау және зерттеулер ұлттық ғылыми орталығы 2024 жылдың 23 қаңтарынан бастап Қазақстан аумағында 1900-ден астам жер сілкінісін тіркеді, оның 11-і сезілді.
Алматы, NEGE. Сейсмикалық белсенділік Қытай мен Қырғызстан шекарасында болған қатты жер сілкінісіне байланысты, оның сейсмикалық толқындары жақын маңдағы елдердің, соның ішінде Қазақстанның аумағына тарады.
«Әдетте, мұндай қарқындылықтағы жер сілкіністерінен кейін афтершоктардың болуы қалыпты, бұл әлі де байқалады. Бұл жағдайдың қанша уақытқа созылатыны көптеген факторларға, соның ішінде жер сілкінісінің эпиорталығы орналасқан аймақтың сейсмикасына және жер жағдайына байланысты. Бірте-бірте сейсмикалық белсендіру процесі әлсірейді және ол қалыпты режимге оралады», – делінген ТЖМ таратқан ақпаратта.
ТЖМ дағдарыс жағдайлардағы басқару орталығының базасында республикалық жедел штабтың жұмысы жалғасуда. Барлық нысандар штаттық режимде жұмыс істейді. Жағдай тұрақты.
«Азаматтарға сабыр сақтап, дүрбелеңге берілмеуге кеңес береміз. Жер сілкінісі кезіндегі қауіпсіздік шараларын есте сақтаңыздар.
Егер сіз ғимараттардың жоғарғы қабаттарында болсаңыз, онда дүмпу тоқтағанша тұрыңыз, алдыңғы есікті алдын ала ашыңыз, бөлмедегі ең қауіпсіз орынға барып тұрыңыз: тірек арқалықтың астында, есіктер немесе негізгі қабырғалардың бұрыштарына, тірек бағанасына жақын тұрмаңыз, терезелерден, ауыр заттардан және жиһаздан алыс тұрыңыз. Сіз үстелдің астына тығыла аласыз немесе ванна бөлмесіне паналай аласыз.
Жер сілкінісі кезінде лифт пен баспалдақты пайдалануға болмайды. Дүмпу тоқтағанша күтіңіз, содан кейін ғана сыртқа шығыңыз.
Көшеде ғимараттардан, электр желілерінен, маңдайшалардан, қоршаулардан және т. б. алыс ашық алаңда тұру керек.
Дәрі-дәрмектер, қажетті заттар, өнімдер, құжаттар, фонарь, жылы заттар кіретін дабыл чемоданын алдын ала дайындаңыздар», – деді төтеншеліктер.
