2025 жылға арналған барлық әлеуметтік міндеттеме орындалды – Мәди Такиев
Үкімет 2025 жылдың қорытындысы бойынша әлеуметтік міндеттемелердің толық көлемде орындалуын қамтамасыз етті.
Астана, NEGE. Бұл жөнінде қаржы министрі Мәди Такиев Мәжілістің жалпы отырысында мәлімдеді. Оның айтуынша, республикалық бюджет шығыстары 25,5 трлн теңге болған.
«Республикалық бюджет шығыстары 99%-ға орындалып, 25,5 трлн теңге болды. Үкімет тарапынан барлық әлеуметтік міндеттемелер орындалды. Өңірлерді қолдауға 7,7 трлн теңге бағытталған болса, әлеуметтік салаға 9,3 трлн теңге бөлінді», – деді Мәди Такиев.
Ұлттық жобалар аясында 198 мектеп пен 655 денсаулық сақтау нысанының құрылысы аяқталған. Сондай-ақ студенттерге арналған 10 мыңнан астам орынға арналған 30 жатақхана пайдалануға берілген.
«Барлық қаржыландыру көзі есебінен 20,1 млн шаршы метр тұрғын үй пайдалануға берілді. Халықтың әлеуметтік осал топтары үшін 5 141 тұрғын үй сатып алынды. Инженерлік инфрақұрылымды дамыту жөніндегі жұмыстар жалғасуда. 980,5 шақырым инженерлік-коммуникациялық инфрақұрылым желісі салынды. Сумен жабдықтау және су бұру жүйелерінің 6,3 мың шақырым желісі салынды және жөнделді», – деп атап өтті Мәди Такиев.
Көлік инфрақұрылымына да қомақты қаражат жұмсалған. 13 мың шақырымға жуық автожол, оның ішінде 9 мың шақырым республикалық маңызы бар жол және 4 мың шақырым жергілікті маңызы бар жолдар жөндеудің барлық түрімен қамтылған.