19 жастағы жігіт өзін өлтірмекші болды
Елордадан Түркістан облысына демалуға барған жігіт шипажайлардың бірінің балконынан секіріп кетпек болды.
Алматы, NEGE. Сарыағаш аудандық полиция бөліміне сағат шамамен 22:20-да жергілікті шипажай мекемесінің директоры хабарласқан. Ол белгісіз жас жігіт суицидке бармақ болып, балконнан секіруге оқталып тұрғанын айтқан. Ақпарат түсісімен шипажайға учаскелік полиция инспекторлары дереу жеткен.
«Полицейлер төртінші қабаттағы бөлмелердің бірінің балконында өзінің тамағын тіліп жіберген және екі қолына шыны сынықтарын ұстап тұрған жас жігітті көрген. Сондай-ақ ол балконнан секіретінін айтқан. Полицейлер уақыт жоғалтпай, шұғыл әрекетке көшкен. Учаскелік полицейлер жігітті сөзге айналдырып тұрғанда, келесі балконнан Сарыағаш АПБ-нің жедел уәкілдері секіріп түсіп, оны құтқарып қалды. Оған алғашқы медициналық жәрдем көрсетіп, дәрігерлерді шақыртты», – деді Түркістан облыстық Полиция департаменті.
19 жастағы жігіт өзіне ем қабылдау үшін анасымен бірге Нұр-Сұлтан қаласынан Сарыағашқа барыпты. Орналасқан туыстарының үйі шипажайға жақын жерде болған. Кешкісін барлығы ұйықтап қалғанда, ол ешкімге білдіртпестен үйден шығып кеткен. Шипажайға келіп, бос номердің біріне кірген. Бөлмеде алма салатын вазаны сындырып, соның сынықтарымен тамырын кеспекші болыпты. Қазір ол ауруханада жатыр.