17 миллион теңгені иемденген екі банк қызметкері ұсталды
Қарағандыда алаяқтық жолмен 17 миллион теңгені иемденген екі банк қызметкері ұсталды, - деп хабарлайды Polisia.kz.
Қарағанды, NEGE. Облыстық ПД криминалдық полиция басқармасының қызметкерлері банктердің бірінің 27 жастағы менеджерін ұстады. Ер адамның үш интернет-алаяқтық дерегіне қатысы бары анықталды. Алдау және сенімге кіру жолымен, қызмет бабын пайдаланып, азаматтардың дербес деректеріне қол жеткізе отырып, өзі жұмыс істейтін банкте және шағын қаржы ұйымдарда несие рәсімдеген. Жәбірленушілерге келтірілген залалдың жалпы сомасы төрт миллион 770 мың теңге.
Сондай-ақ, полиция 31 жастағы тағы бір ер адамның заңсыз әрекеттерін анықтады. Ол қылмыстық схемасын клиенттерге мерзімі өткен несиелер бойынша көмек көрсету сылтауымен жүзеге асырған.
"Қазіргі уақытта үшінші тұлғаға несие беру бойынша он екі факт анықталды. Келтірілген залалдың жалпы сомасы 12 миллион теңге. Күдіктіге қатысты күзетпен ұстау түріндегі бұлтартпау шарасы таңдалды", - деді ДП басшысының орынбасары Әбіл Әбілдин.
