15 наурыз Конституция күні болып белгіленді, ал жазда Парламент сайлауы өтеді
Бұл жөнінде Мемлекет басшысы Қасым-Жомарт Тоқаев референдумға белсене қатысқан жастармен кездесу барысында айтты.
Астана, NEGE. Қасым-Жомарт Тоқаев жастармен тілдесуінде 15 наурыз тарихи күнге айналғанын атап өтті.
«Шын мәнінде, бұл күн ел өмірінде мәңгі сақталады. Енді 15 наурыз – Конституция күні болып белгіленеді. Бұл – еліміздің басты құжаты. Мен басқа да мемлекеттердің конституцияларымен танысып шықтым. Біздің Конституциямыз ең үздік Ата заңдардың қатарында тұрады деп сеніммен айта аламын», – деді ол.
Президент жазда Парламент сайлауы өтетінін мәлімдеді.
«Алдымызда жұмыс көп. Енді жазда Парламент сайлауы өтеді. Оны бір ел болып атқаруымыз керек. Бұл жастардың парламенті болуы қажет деп ойлаймын», – деді Қасым-Жомарт Тоқаев.
Еске салсақ, 15 наурыз күні Қазақстанда жаңа Конституцияны қабылдауға байланысты референдум өтті. Орталық референдум комиссиясының алдын-ала мәліметі бойынша, референдумда 9 миллионнан астам қазақстандық дауыс берген, бұл тізімге енгізілген азаматтардың 73,24 пайызына тең.
