13 жасында студент атанған дарын иесі кеш өткізді
Рахат-Би Төлегенұлының есімі бүгінде тек елімізде ғана емес шет елге де кеңінен танымал. 20 жасар өнерпаз жас болса да осы уақытқа дейін симфониялық оркестрге және камералық ансамбльдерге арналған 100-ден аса туындылар жазып, көптеген беделді халықаралық композитор және пианист конкурстарының жеңімпазы атанды.
Алматы, NEGE. «Қазақстанның моцарты» атанған Рахат-Би Атырауда «Зымыран заман» атты симфониялық есеп беру кешін өткізді. Жас таланттың өнерін тамашалауға келген халықтың қарасы қалың болды. Кеш иесінің «Өмірге құштарлық», «Жыл құстарының сыңсуы» атты туындылары классикалық өнерге шөлдеген атыраулықтарға ерекше әсер сыйлады. Рахат-Бидің шығармашылығына тыңдарман жоғары бағасын берген десек, артық айтқандық емес. Бүгінде жас композитордың шығармаларын әлемге белгілі музыканттары орындап жүр.
Айта кетейік, ерекше дарын иесі небәрі 13 жасында студент атанып, 17 жасында Құрманғазы атындағы Қазақ Ұлттық консерваториясын үздік тәмамдады. Сонымен қатар, бірнеше тілді еркін меңгерген.
