12 маусым – жалпыұлттық аза тұту күні
Мемлекет басшысы Қасым-Жомарт Тоқаев «Семей орманы» табиғи резерватындағы алапат өрт салдарынан қаза тапқан орман шаруашылығы қызметкерлерінің туыстары мен жақындарына көңіл айтты.
«Көңіл айтуға арнайы келіп отырмын. Бұл – бүкіл халқымыз үшін үлкен қасірет. Еліміздің қайғысы. Бекем болыңыздар, орны толмас қайғы екенін түсінемін. Сіздерге жан-жақты көмек көрсету жөнінде Үкіметке тапсырма бердім. Үкіметке немесе жеке маған өтініштеріңіз болса, айтыңыздар. Барлық өтінішті орындаймыз.
Фото: Ақорда
Қаза тапқан азаматтар қайтып келмейді. Бірақ өмір жалғасады. Осы қайғылы жағдайға кінәлілердің бәрі жауапқа тартылады.
Дүйсенбі күнін еліміз бойынша жалпыұлттық аза тұту күні деп жарияладым. Біз қаза тапқан азаматтарды еске аламыз. Сабыр сақтап, бекем болыңыздар.
Құқық қорғау органдары мен министрлік тарапынан болсын, барлық салалар бойынша тиісті шаралар қабылданады. Бұл жағдайдан міндетті түрде қорытынды шығарамыз», – деді президент.
