11 дәріханада емдік препараттар қымбатқа сатылған
Алматы облысындағы 11 дәріханада емдік препараттар бекітілген бағадан қымбатқа сатылған.
Алматы, NEGE. Көбіне сұранысқа ие жұқпалы ауруға қарсы дәрілердің құны негізсіз өсіріліпті. Фармацевтикалық өнім сататындардың бұндай заңсыз әрекетін арнайы тексеріс жүргізген мониторингтік топ анықтады. Құзырлы мекеме өкілдері өңірдегі 150-ден аса дәрі сататын сауда орындарын аралап шыққан. Соның нәтижесінде анықталған кемшіліктерге байланысты тиісті хаттама толтырылды.
Облыстық сыбайлас жемқорлыққа қарсы іс қимыл департаментінің басқарма басшысы Асқар Садықов: "Осы мониторингтің қорытындысы бойынша 11 хаттама толтырылды. Фармбақылау қызметкерлерімен бірлесіп, 130-дан 200 айлық көрсеткішке дейін айыппұл салынатын болады" деді.
