$1 млрд туралы іс: АҚШ-та екі қазақстандыққа алаяқтық жасады деген айып тағылды
Чикагода Қазақстанның екі азаматына АҚШ-тың Medicare және Medigap медициналық сақтандыру бағдарламалары бойынша көпдеңгейлі алаяқтық схемаларға қатысы бар деген айып тағылды, деп хабарлайды cwbchicago.com.
Алматы, NEGE. Мемлекеттік бағдарламалар мен жеке сақтандыру компаниялары емделушілерге іс жүзінде көрсетілмеген медициналық жабдықтар мен диагностикалық тексерулер үшін жалған өтінімдер алған. Нәтижесінде 1 млрд доллардан астам шығынға ұшырады.
Оқиғалардың бірінде басты фигурант ретінде Қазақстан азаматы Ануар Абдрахманов аталды. Оған Medicare бағдарламасына қарсы жасалған алаяқтыққа байланысты ақшаны жылыстату мақсатында сөз байласты деп айып тағылды.
Ануар Абдрахманов Кентукки штатындағы Priority One Medical Equipment компаниясын бақылауға алып, 2024 жылғы наурыз бен тамыз аралығында глюкоза деңгейін үздіксіз бақылау құрылғылары мен катетерлерге арналған Medicare бағдарламасы бойынша жалған өтінімдер беру үшін пайдаланған деген айыппен жауапқа тартылуда. Айыпталушының әрекеттерінен жалпы шамамен 666 млн доллар көлемінде шығын келген.
Сот құжаттарына қарағанда, Абдрахманов 2023 жылғы мамырда АҚШ-қа жазғы жұмыс визасымен келген, алайда оның визасы сол жылдың қыркүйегінде аяқталғанына қарамастан елде қалып қойған. Сонымен қатар, 2024 жылғы сәуірде ол Priority One компаниясына мүше және басқарушы ретінде қосылған.
Тергеушілердің мәліметінше, 2024 жылғы мамыр мен тамыз аралығында Medicare бағдарламасы бойынша Priority One компаниясына қатысты шамамен 250 шағым түскен, олардың көпшілігі компаниядан ешқандай тауар немесе қызмет алмағандарын хабарлаған.
2024 жылғы шілдеде, тергеушілер Кентуккидегі Priority One кеңсесін бақылап жатқанда, кеңсенің жабық әрі бос тұрғанын байқаған. Кеңседе жұмысқа жалданған қызметкерлер тергеушілерге өздерінің жалғыз міндеті – поштаны жинап, оны Telegram шифрланған хабар алмасу қосымшасы арқылы басшыға жіберу екенін, ол басшымен олар ешқашан жеке кездеспегенін айтқан.
Сот құжаттарына сәйкес, бір қызметкер чектерді FedEx арқылы Чикаго маңындағы мекенжайларға жіберген.
Шағымда көрсетілгендей, 2024 жылғы шілдеде Medicare Priority One компаниясына төлемді тоқтатқанымен, қосымша сақтандыру компаниялары шамамен 450 000 доллар төлем жасаған. Қаржылық құжаттарға сәйкес, Абдрахманов кейін шамамен 182 000 долларды Гонконгтағы есепшоттарға аударған және басқа шетелдік есепшоттарға 200 000 доллардан астам аударуға әрекет жасаған.
2024 жылғы тамызда тергеушілер Абдрахмановты Priority One компаниясының банктік есепшотына Medigap арқылы берілген шамамен 22 500 доллар құрайтын 30 чекті енгізіп жатқан жерінде ұстап қалған.
Екінші іс бойынша прокуратура Чикагода тұратын Қазақстан азаматы Таир Смағұлды айыптап отыр. Оған Medicare бағдарламасы аясындағы ауқымды алаяқтықтан түскен қаражатты жылыстату үшін сөз байласу бойынша айып тағылған. Алаяқтық Коннектикут штатында орналасқан, Medicare мақұлдаған қызмет көрсетуші компания Medical Home Care Inc. қатысты болған.
Федералдық билік мәліметінше, 2023 жылдың желтоқсанынан 2024 жылғы қыркүйекке дейін Таир Смағұл Medical Home Care Inc. компаниясын бақылап, ел көлеміндегі алаяқтық схемасына қатысқан. Бұл схема бойынша Medicare және Medigap сақтандыру компанияларына катетерлер мен басқа да медициналық жабдықтар үшін жалған шоттар жіберілген. Шын мәнінде бұл жабдықтар пациенттерге қажет болмаған және жеткізілмеген.
Айыптау актісі бойынша, Medical Home Care 2023 жылғы мамырдан 2024 жылғы маусымға дейін шамамен 470 000 өтінім жолдап, шамамен 953 миллион доллар сомасында шығын келтірген. Осы кезеңде Medicare бұл компанияға қатысты 27 377 шағым алған.
Қаржылық құжаттарға сәйкес, 2024 жылғы қаңтар–ақпан айларында Medigap сақтандыруын беретін компаниялар Medical Home Care компаниясына алаяқтық талаптар бойынша кемінде 854 080 доллар төлеген. Сол кезде компанияны Таир Смағұлдың бақылауында болған.
Тергеушілердің мәліметінше, Таир Смағұл бірнеше рет Иллинойс штатындағы банкоматтардан алаяқтық шоттардан ақша алып, соңында Medical Home Care банктік есепшоттарын жауып, қаражатты өз жеке шотына аударған.
