Жасөспірімді ажалдан құтқарып қалған Ұлттық ұлан сарбаздары марапатталды
Жасөспірімді ажалдан құтқарып қалған Ұлттық ұлан сарбаздары марапатталды, деп хабарлайды Polisia.kz.
Алматы, NEGE. Бүгін Ұлттық ұланның 5573 әскери бөлімінің саптық алаңында жасөспірімді ажалдан құтқарып қалған Ұлттық ұлан сарбаздары марапатталды.
Аталмыш шараға әскери бөлім командирі Аян Есжанов, “Ақ жол” ҚДП Астана қаласы бойынша филиалы төрағасының орынбасары, Мәслихат депутаты Абзал Әбенов, партияның жастар саясаты бойынша кеңесшісі Ұлан Құсайынов, Астана қаласының төтенше жағдайлар департаменті бастығының орынбасары Мадияр Мырзагелдинов қатысты.
Елордалық құраманың жауынгерлері қала тыныштығын күзету бойынша қызметке түсу үшін салтанатты сап түзеп тұрды. Әскери бөлім командирі марапаттау үшін әскери жасақты мінбер алдына шақырды. Сарбаздар үштігі әскери жүріспен мінбердің алдына келіп, сапқа тұрды.
Алғашқы болып “Ақ жол” партиясының өкілдері сарбаздарды марапаттады. Екі сарбазға мақтау қағазын ұсынса, қатардағы Әлішер Махметтің кеудесіне медаль тақты. Олардың айтуынша, Әлішердей жастар – еліміздің болашағы. Содан кейін, Астана қаласының төтенше жағдайлар департаменті бастығының орынбасары Мадияр Мырзагелдинов ҚР Төтенше жағдайлар министрінің бұйрығын оқып, ұландық Әлішер Махметке ведомствоның медалін табыс етті.
– Ұлттық ұлан сарбазы Әлішерге оқиға орнында ерлік танытып, адам өмірін құтқарғаны үшін алғыс білдіреміз, – деді Мырзагелдинов.
Сарбаздың өзі болса, бұл оның Отан алдындағы міндеті екені, және құраманың барлық сарбаздары оның орнында болса, осылай жасайтынын айтты.
– Мен үшін бүгінгі марапаттардың орны ерекше. Ерлігімді ескергені үшін Ұлттық ұлан Бас қолбасшысына, әскери бөлім командиріне және ҚР Төтенше жағдайлар министірлігі мен партия өкілдеріне алғыс айтамын. Біздің міндетіміз тыныштықты қорғау, елге көмектесу, – деді жас сарбаз.
Қатардағы Әлішер Махмет Солтүстік Қазақстан облысының тумасы, өткен жылдың қараша айында 5573 әскери бөліміне Отан алдындағы борышын өтеу үшін келген. Жастарды азаматтық борышын өтеуге шақырады.
Еске салып кетейік, 15 маусым күні кешкіуақытта Астана қаласында 5573 әскери бөлімінің қатардағы жауынгерлері Әлішер Махмет, Арсен Қази мен Ринат Досщанов қызмет атқару кезінде Ақбұлақ өзенінен жүзіп өтемін деп суға бата жаздаған №63 мектеп оқушысын құтқарған болатын.
