Павлодардың су беру жүйесі қалпына келтірілді
Облыс орталығын сумен қамту жүйесіне жауапты компания өкілдері судың жақын уақытта қайтадан қалпына келе бастайтынын жеткізді. Алайда көпқабатты үйлердің тұрғындары құбырлар бойымен су әзірше жүгіре қоймағанын айтып отыр. Бұл туралы ҚазАқпарат хабарлады.
Павлодар, NEGE. Павлодар қаласында сорғы стансасынан ақау шығып, су беру жұмыстары шектелді. Салдарынан бүгін түске қарай Павлодар қаласының көп бөлігінде cу болмады.
Жұртшылық дүкендердегі ауызсуды жапа-тармағай сатып алып, көп жерлерде су тапшылығы байқалып қалды. Көшелердегі су ауызсу құбырларында ұзын-сонар кезек пайда болды.
«Бүгін сағат 21.00-дегі жағдай бойынша технологиялық жабдықтағы ақау қалпына келтіріліп, қалаға су беріле бастады», деп хабарлады «Павлодар-водоканал» мекемесі.
Алайда сумен қамту мекемесі нақты қандай жабдықтың істен шыққаны жайында әзірге тіс жармай отыр.
Сағат 22.30-да қалада жағдай өзгерген жоқ. Тұрғын үйлердің шамамен 80-90 пайызы әлі де сусыз отыр.
