Полиция ұстап әкеткен Рысбек Сарсенбай жансақтау бөлімінде жатыр
Саясаткер Рысбек Сәрсенбайды полициядан жедел жәрдем алып кетті. Ол бүгін саяси тұтқындар туралы шараға қатыспақ болған.
Алматы, NEGE. Құқық қорғаушы Евгений Жовтистің айтуынша, Рысбек Сәрсенбай мен оның жұбайы Маржан Аспандияроваға қарсы полиция қызметкерлері дөрекі күш қолданған. Саясаткердің қысымы көтерілген соң, полиция жедел жәрдем шақыруға мәжбүр болған.
«Полиция қызметкерлері көліктегі Рысбек ағаның қан қысымы көтерілгеніне қарамастан ең бірінші полиция бөлімшесіне апарған. Одан кейін ғана жедел-жәрдем шақыртқан. Бүгінгі жиын – ол митинг емес! Ол тұтқындағы белсенділердің туыстарымен ашық сұхбат болатын!» - дейді Рысбек Сәрсенбайдың туыстарының бірі.
Бұған дейін хабарланғандай, Рысбек Сәрсенбай – саяси тапсырыспен өлтірілген оппозиция жетекшісі Алтынбек Сәрсенбаевтың ағасы, саяси және қоғам қайраткері.
