Маман даярлау – жауапты іс
Алматы қаласының білім беру мекемелерімен өзара әрекеттесіп, әріптестікті нығайту мақсатында ҚР Көлік министрлігі Автомобиль жолдары комитеті төрағасының орынбасары Анар Ғабдуллина «ҚазжолҒЗИ» АҚ, «ҚазАвтоЖол» ҰК» АҚ және «Жол активтерінің ұлттық сапа орталығы» РМК-мен бірлесіп бірқатар жоғары оқу орындарын аралады.
Алматы, NEGE. Сапардың мақсаты – жол-құрылыс саласындағы кадрларды даярлаудың перспективаларын талқылау, сондай-ақ, білім беру мекемелерімен тығыз ынтымақтастық орнату.
Сапар барысында оқу үдерісімен және оқу зертханаларымен танысып, Алматының бірнеше жоғары оқу орындарының профессорлық-оқытушылық құрамымен кездесу өтті.
Кездесулерге қатысқан Жол активтері ұлттық сапа орталығы Алматы филиалының директоры Мәулен Тоқтарбайұлы мұндай бас қосулардың маңызды екенін атап өтті. Орталықтың инженерлері Алматыдағы жол мамандарын дайындайтын оқу орындарына жиі-жиі барып, кәсіптік бағдар беру бойынша дәрістер оқитынын жеткізді. Жолшы мамандығына қызыққан жастарға ашық есік күндері ұйымдастырылып, жол сапасын бақылау жұмыстарының қыр-сыры таныстырылатыны айтылды.
