Батыс Қазақстанда есепші 7 млн теңге бюджет қаражатын құмар ойынға салып жіберген
Батыс Қазақстан облысында есепші 7 млн теңге бюджет қаражатын құмар ойынға жұмсап жіберген.
Алматы, NEGE. БҚО прокуратурасының баспасөз қызметінен мәлім еткендей, оқиға Қаратөбе ауданында болды.
Қаратөбе ауданы прокуратурасы сотқа дейінгі тергеудің бірыңғай тізіліміне ҚР ҚК 189-бабы 3-бөлімі 1-тармағына (ірі мөлшерде сенiп тапсырылған бөтен мүлiктi иемденiп алу немесе талан-таражға салу) сәйкес материалды тіркеп, БҚО бойынша экономикалық тергеп-тексеру департаментіне жолдады.
«Қаратөбе ауданы әкімдігі ішкі саясат бөлімі Жастар ресурстық орталығы есепшісінің құмар ойынмен айналысқаны анықталды. Есепші басшының рұқсатынсыз және бұйрығынсыз оның ЭЦҚ-сын пайдалана отырып, 7 млн теңгеге жуық бюджет қаражатын жымқырған. Есепші жауабында өзінің және жұбайының атына ашылған жеке кәсіпкерлік субъектісіне бюджет қаржысын бірнеше рет аударып келгенін айтты. Қазіргі таңда оны экономикалық тергеп-тексеру департаменті күдікті ретінде таныды. Кінәсі дәлелденген жағдайда оған 7 жылға дейін бас бостандығынан айыру жазасы тағайындалуы мүмкін» деп хабарлады ведомстводан.