Су тасқыны Жамбыл облысына да жетті
Кеше түнде Жамбыл облысы, Жамбыл ауданының аумағындағы Жасөркен ауылын су шайып жатыр деген ақпарат тарады.
Әлеуметтік желіде тараған бейне және аудио материалдарда ауылдағы мектеп пен бірнеше үйді су басып жатқаны айтылады. Тұрғындар ауыл азаматтарын көмекке шықырып, жедел әрекет етуге шақыруда.
Көп ұзамай облыс әкімдігінің ресми ақпараты тарады.
Онда әкімдіктің баспасөз қызметі тосыннан келген тасқын су облыс басшылығының толық бақылауына алынғанын мәлімдеп отыр.
«Жамбыл ауданы, Жасөркен ауылындағы жағдай бақылауда. Аталған аумақта жұмыстар жүргізілуде. 2024 жылдың 15 сәуірінде сағат 20:35-те Жамбыл ауданы Жасөркен ауылында қатты жауын-шашынның салдарынан Жасөркен көшесіндегі 7 ауланы (№54, 52, 50, 48, 49, 51, 53) және М.Әуезов атындағы орта мектеп аумағын су басқандығы туралы ақпарат келіп түсті. Қазіргі уақытта оқиға орнында жергілікті атқарушы органдар, ТЖД-нен 51 адам, 4 бірлік техника (2 тиегіш, 2 экскаватор), 10 бірлік техника және 6 мотопомпа жұмыс істеуде. Жағдай облыс әкімі Ербол Қарашөкеевтің жеке бақылауында», – делінген ресми хабарламада.
Естеріңізге сала кетсек, тұрғындардың айтуынша 15 сәуір күні Тараз қаласы аумағында таңертеңнен бері толассыз жаңбыр жауып тұрған.