Бас прокуратура интернет-алаяқтықтың жаңа түрі пайда болғанын ескертті
Бас прокуратура елімізде интернет-алаяқтықтың жаңа түрі пайда болғанын мәлімдеді. Уақыт өткен сайын алданып қалған адамдардың саны артып келе жатыр.
Астана, NEGE. «Алаяқтар жәбірленушілерге құқық қорғау органдарының қызметкері ретінде бейне-қоңырау арқылы хабарласып, белгісіз тұлғалар жәбірленушінің атынан несие алуға әрекеттеніп жатқаны туралы жалған ақпарат береді. Осы „несиені“ жою үшін дереу жаңа несие алуға банк бөлімшесіне баруды ұсынады. Банктен алған несие ақшасын жаңа „қауіпсіз“ шотқа аударуды өтінеді. Бұл — алаяқтардың шоты», — дейді Бас прокуратура таратқан ресми хабарламада.
Бас прокуратура құқық қорғау органдары қызметкерлері видео-қоңыраумен ешқашан хабарласпайтынын, мұндай форматта жұмыс істемейтінін ескертеді. Бөтен адамға, тіпті құқық қорғау органдарының қызметкерлеріне де банк мәліметтерін бермеуге, күмәнді жағдайлар туындағанда 115 нөміріне қоңырау шалуға шақырды.